細佬結婚果日, d親戚黎晒屋企, 果日我自己化粧set頭攪掂自己之後, 承蒙各位親戚俾面, 叫我幫佢set埋頭(當然係親戚個頭). 托頼, 效果ok都算唔錯, 連果位新娘化粧師都問我係做邊行. 之後, 細佬老婆建議我考慮轉行, 與其同人比學歷, 不如同人比能力(技術)咁話.
呢樣野我真係從來都無諗過. 的確, 同人比學歷嘅話, 一開始就註定失敗, 因為家下我連high dip. 都未到手, 年紀亦唔細. 能力嘅話如果唔係技術為主嘅行業, 無學歷連埋一齊跟本都變得無價值, 家下d老細多數係睇學歷而唔係睇能力, 更何況能力嘅野唔會咁易係interview睇到, 除非老細要嘅係水怪(吹水嘅能力).
老實講, 做化粧呢家野我只會當興趣玩下, 當成一份工黎做我一d興趣都無, 因為我個人太直, 又唔識刷鞋, 就算有技術都只會攪到自已無生意, 性格決定命連嘛!
雖然無諗過, 但唔知點解硬係好在意呢句說話. 能力呀! 我一直都覺得自己有, 只係去到今時今日, 要阿sir幫手先可以搵到工, 仲要係第二行, 一切要從頭開始都唔係問題, 問題係眼見同期嘅兩位同事, 一個本科畢業, 一個讀緊本科又有經驗, 我開始問自己: 究竟我係度做乜呢?
坦白講, 我的確比較鐘意做account多d, 但係我對account呢行又真係好灰好失望. 家陣做呢行又覺得唔係咁啱自己. 雖然, 我點都會繼續做住先, 因為就快又要交學費, 加上唔想浪費左阿sir幫我嘅好意, 亦唔想浪費左家陣教我做野嘅同事嘅心機. 但係繼續咁落去我又可以點呢? 讀完呢個course就要決定, degree我應該唔會夠錢讀, 考牌嘅話應該考番account related定係家陣做緊嘅呢行呢? 不過考得黎幾十歲年紀大又好難搵野做....... 話唔定, 同事講得啱, 我諗野太複雜啦! 似乎, 唔好諗咁多會好d, 點諗都唔會諗得掂架啦家陣.
